Trium Puerórum

Antíphona.

Trium puerórum cantémus hymnum, quem cantábant Sancti in camíno ignis, benedicéntes Dóminum. (T. P. Allelúia).
1. Benedícite, ómnia ópera Dómini, Dómino: laudáte et superexaltáte eum in sǽcula.
2. Benedícite, cæli, Dómino: benedícite, Angeli Dómini, Dómino.
3. Benedícite, aquæ omnes, quæ super cælos sunt, Dómino: benedícat, omnis virtus Dómino.
4. Benedícite, sol et luna, Dómino: benedícite, stellæ cæli, Dómino.
5. Benedícite, omnis imber et ros, Dómino: benedícite, omnes venti, Dómino.
6. Benedícite, ignis et æstus, Dómino: benedícite, frigus et æstus, Dómino.
7. Benedícite, rores et pruína, Dómino: benedícite, gelu et frigus, Dómino.
8. Benedícite, glácies et nives, Dómino: benedícite, noctes et dies, Dómino.
9. Benedícite, lux et ténebræ, Dómino: benedícite, fúlgura et nubes, Dómino.
10. Benedícat terra Dóminum: laudet et superexáltet eum in sǽcula.
11. Benedícite, montes et colles, Dómino: benedícite, univérsa germinántia in terra, Dómino.
12. Benedícite mária et flúmina, Dómino. Benedícite fontes, Dómino.
13. Benedícite, cete, et ómnia quæ movéntur in aquis, Dómino: benedícite, omnes vólucres cæli, Dómino.
14. Benedícite, omnes béstiæ et pécora, Dómino: benedícite, fílii hóminum, Dómino.
15. Bénedic Israël Dómino: laudáte et superexáltate eum in sǽcula.
16. Benedícite, sacerdótes Dómini, Dómino: benedícite, servi Dómini, Dómino.
17. Benedícite, spíritus et ánimæ iustórum, Dómino: benedícite, sancti et húmiles corde, Dómino.
18. Benedícite, Ananía, Azaría, Mísaël, Dómino: laudáte et superexaltáte eum in sǽcula.
19. Benedicámus Patrem et Fílium cum Sancto Spíritu: laudémus et superexaltémus eum in sǽcula.
20. Benedíctus es in firmaménto cæli: et laudábilis, et gloriósus in sǽcula.
Hic non dícitur Glória Patri, neque Amen.
1. Laudáte Dóminum in sanctuário eius: laudáte eum in firmaménto virtútis eius.
2. Laudáte eum in magnálibus eius: laudáte eum secúndum multitúdinem magnitúdinis eius.
3. Laudáte eum in sono tubæ: laudáte eum in psaltério et cíthara.
4. Laudáte eum in týmpano, et choro: laudáte eum in chordis, et órgano.
5. Laudáte eum in cýmbalis benesonántibus: laudáte eum in cýmbalis iubilatiónis: omne quod spirat laudet Dóminum.
Glória Patri, et Fílio, et Spirítui Sancto.
Sicut erat in princípio, et nunc et semper, et in sǽcula sæculórum. Amen.


Antíphona.

Trium puerórum cantémus hymnum, quem cantábant Sancti in camíno ignis, benedicéntes Dóminum. (T. P. Allelúia).
Omnes exsúrgunt, et qui preces moderátur dicit:
V/. Kýrie, eléison.
R/. Christe, eléison. Kýrie, eléison.
Pater noster...
V/. Et ne nos indúcas in tentatiónem.
R/. Sed líbera nos a malo.
V/. Confiteántur tibi, Dómine, ómnia ópera tua.
R/. Et Sancti tui benedícant tibi
V/. Exsultábunt Sancti in glória.
R/. Lætabúntur in cubílibus suis.
V/. Non nobis, Dómine, non nobis.
R/. Sed nómini tuo da Glóriam.
V/. Dómine, exáudi oratiónem meam.
R/. Et clamor meus ad te véniat.
Sacerdotes addunt:
V/. Dóminus vobíscum.
R/. Et cum spíritu tuo.

Orémus.

Deus, qui tribus púeris mitigásti flammas ígnium: concéde propítius; ut nos fámulos tuos non exúrat flamma vitiórum.

Actiónes nostras, quǽsumus, Dómine, aspirándo prǽveni et adiuvándo proséquere: ut cuncta nostra orátio et operátio a te semper incípiat, et per te coepta finiátur.

Da nobis, quǽsumus, Dómine, vitiórum nostrórum flammas exstínguere: qui beáto Lauréntio tribuísti tormentórum suórum incéndia superáre. Per Christum, Dóminum nostrum.

R/. Amén.

Psalm II
Antíphona.

Regnum eius regnum sempitérnum est, et omnes reges sérvient ei et obedient. (T. P. Allelúia).
1. Quare fremuérunt gentes, et pópuli meditáti sunt inánia?
2. Astitérunt reges terræ, et príncipes convenérunt in unum advérsus Dóminum et advérsus Christum eius:
3. «Dirumpámus víncula eórum et proiciámus a nobis iugum ipsórum!».
4. Qui hábitat in cælis, irridébit eos, Dóminus subsannábit eos.
5. Tunc loquétur ad eos in ira sua et in furóre suo conturbábit eos:
6. «Ego autem constítui regem meum super Sion, montem sanctum meum!».
7. Prædicábo decrétum eius. Dóminus dixit ad me: «Fílius meus es tu; ego hódie génui te.
8. Póstula a me, et dabo tibi gentes hereditátem tuam et possessiónem tuam términos terræ.
9. Reges eos in virga férrea et tamquam vas fíguli confrínges eos».
10. Et nunc, reges, intellégite, erudímini, qui iudicátis terram.
11. Servíte Dómino in timóre et exsultáte ei cum tremóre.
12. Apprehéndite disciplínam, ne quando irascátur, et pereátis de via, cum exárserit in brevi ira eius. Beati omnes, qui confídunt in eo.
Glória Patri, et Fílio, et Spirítui Sancto.
Sicut erat in princípio, et nunc, et semper, et in sǽcula sæculórum. Amen.

Antiphona.

Regnum eius regnum sempitérnum est, et omnes reges sérvient ei et obedient. (T. P. Allelúia).

V/. Dómine, exáudi oratiónem meam.
R/. Et clamor meus ad te véniat.

Sacerdotes addunt:

V/. Dóminus vobíscum.
R/. Et cum spíritu tuo.
Orémus
Omnípotens sempitérne Deus, qui in dilécto Fílio tuo, universórum Rege, ómnia instauráre voluísti: concéde propítius; ut cunctæ famíliæ géntium, peccáti vúlnere disgregátæ, eius suavíssimo subdántur império: Qui tecum vivit et regnat in unitáte Spíritus Sancti Deus: per ómnia sǽcula sæculórum.
R/. Amen.

Adorote Devote

1. Adóro te devóte, latens Déitas,
quæ sub his figúris vere látitas.
Tibi se cor meum totum súbiicit,
quia, te contémplans, totum déficit.

2. Visus, tactus, gustus in te fállitur,
sed audítu solo tuto créditur.
Credo quidquid dixit Dei Fílius:
nil hoc verbo veritátis vérius.

3. In Cruce latébat sola Déitas;
at hic latet simul et humánitas.
Ambo tamen credens atque cónfitens,
peto quod petívit latro pǽnitens.

4. Plagas, sicut Thomas, non intúeor;
Deum tamen meum te confíteor.
Fac me tibi semper magis crédere,
in te spem habére, te dilígere.

5. O memoriále mortis Dómini!
Panis vivus vitam præstans hómini,
prǽsta meæ menti de te vívere,
et te illi semper dulce sápere.

6. Pie pellicáne, Iesu Dómine,
me immúndum munda tuo sánguine:
cuius una stilla salvum fácere
totum mundum quit ab omni scélere.

7. Iesu, quem velátum nunc aspício,
oro, fiat illud quod tam sítio;
ut te reveláta cernens fácie,
visu sim beátus tuæ glóriæ.
Amén.

Quicumque

Antíphona.
Glória tibi, Trínitas æquális, una Déitas, et ante ómnia sǽcula, et nunc, et in perpétuum. (T. P. Allelúia).
1. Quicúmque vult salvus esse, ante ómnia opus est, ut téneat cathólicam fidem:
2. Quam nisi quisque íntegram inviolatámque serváverit, absque dúbio in ætérnum períbit.
3. Fides autem cathólica hæc est: ut unum Deum in Trinitáte, et Trinitátem in unitáte venerémur.
4. Neque confundéntes persónas, neque substántiam separántes.
5. Alia est enim persóna Patris, ália Fílii, ália Spíritus Sancti.
6. Sed Patris, et Fílii, et Spíritus Sancti una est divínitas, æquális glória, coætérna maiéstas.
7. Qualis Pater, talis Fílius, talis Spíritus Sanctus.
8. Increátus Pater, increátus Fílius, increátus Spíritus Sanctus.
9. Imménsus Pater, imménsus Fílius, imménsus Spíritus Sanctus.
10. Ætérnus Pater, ætérnus Fílius, ætérnus Spíritus Sanctus.
11. Et tamen non tres ætérni, sed unus ætérnus.
12. Sicut non tres increáti, nec tres imménsi, sed unus increátus et unus imménsus.
13. Simíliter omnípotens Pater, omnípotens Fílius, omnípotens Spíritus Sanctus.
14. Et tamen non tres omnipoténtes, sed unus omnípotens.
15. Ita Deus Pater, Deus Fílius, Deus Spíritus Sanctus.
16. Et tamen non tres Dii, sed unus est Deus.
17. Ita Dóminus Pater, Dóminus Fílius, Dóminus Spíritus Sanctus.
18. Et tamen non tres Dómini: sed unus est Dóminus.
19. Quia, sicut singillátim unamquámque persónam Deum ac Dóminum confitéri christiána veritáte compéllimur: ita tres Deos aut Dóminos dícere cathólica religióne prohibémur.
20. Pater a nullo est factus: nec creátus, nec génitus.
21. Fílius a Patre solo est: non factus, nec creátus, sed génitus.
22. Spíritus Sanctus a Patre et Fílio: non factus, nec creátus, nec génitus, sed procédens.
23. Unus ergo Pater, non tres Patres: unus Fílius, non tres Fílii: unus Spíritus Sanctus, non tres Spíritus Sancti.
24. Et in hac Trinitáte nihil prius aut postérius, nihil maius aut minus: sed totæ tres persónæ coætérnæ sibi sunt et coæquáles.
25. Ita ut per ómnia, sicut iam supra dictum est, et únitas in Trinitáte, et Trínitas in unitáte veneránda sit.
26. Qui vult ergo salvus esse, ita de Trinitáte séntiat.
27. Sed necessárium est ad ætérnam salútem, ut Incarnatiónem quoque Dómini nostri Iesu Christi fidéliter credat.
28. Est ergo fides recta, ut credámus et confiteámur quia Dóminus noster Iesus Christus, Dei Fílius, Deus et homo est.
29. Deus est ex substántia Patris ante sǽcula génitus: et homo est ex substántia matris in sǽculo natus.
30. Perféctus Deus, perféctus homo: ex ánima rationáli et humána carne subsístens.
31. Æquális Patri secúndum divinitátem: minor Patre secúndum humanitátem.
32. Qui, licet Deus sit et homo, non duo tamen, sed unus est Christus.
33. Unus autem non conversióne divinitátis in carnem: sed assumptióne humanitátis in Deum.
34. Unus omníno, non confusióne substántiæ: sed unitáte persónæ.
35. Nam sicut ánima rationális et caro unus est homo: ita Deus et homo unus est Christus.
36. Qui passus est pro salúte nostra: descéndit ad ínferos: tértia die resurréxit a mórtuis.
37. Ascéndit ad cælos, sedet ad déxteram Dei Patris omnipoténtis: inde ventúrus est iudicáre vivos et mórtuos.
38. Ad cuius advéntum omnes hómines resúrgere habent cum corpóribus suis: et redditúri sunt de factis própriis ratiónem.
39. Et qui bona egérunt, ibunt in vitam ætérnam: qui vero mala, in ignem ætérnum.
40. Hæc est fides cathólica, quam nisi quisque fidéliter firmitérque credíderit, salvus esse non póterit.
Glória Patri, et Fílio, et Spirítui Sancto.
Sicut erat in princípio, et nunc, et semper, et in sǽcula sæculórum. Amen.

Antiphona.

Glória tibi, Trínitas æquális, una Déitas, et ante ómnia sǽcula, et nunc, et in perpétuum. (T. P. Allelúia).

V/. Dómine, exáudi oratiónem meam.
R/. Et clamor meus ad te véniat.
Sacerdotes addunt:
V/. Dóminus vobíscum.
R/. Et cum spíritu tuo.

Orémus
Omnípotens sempitérne Deus, qui dedísti fámulis tuis, in confessióne veræ fídei, ætérnæ Trinitátis glóriam agnóscere, et in poténtia maiestátis adoráre unitátem: quǽsumus; ut, eiúsdem fídei firmitáte, ab ómnibus semper muniámur advérsis. Per Dóminum nostrum Iesum Christum Fílium tuum: qui tecum vivit et regnat in unitáte Spíritus Sancti Deus, per ómnia sǽcula sæculórum.

R/. Amen.

Trisagi angelicum

In nómine Patris et Fílii † et Spíritus Sancti.
Amen.
Dómine, lábia mea apéries.
Et os meum annuntiábit láudem tuam.
Deus, in adiutórium meum inténde.
Dómine, ad adiuvándum me festína.
Glória Patri et Fílio, et Spirítui Sancto.
Sicut erat in princípio, et nunc et semper et in sǽcula sæculórum. Amen.

Primera dena
Primerament diuen tots la deprecació Sanctus Deus …; després alternen l'oració dominical el sacerdot (o qui dirigeix el rés) i la resta; a continuació, es repeteix nou vegades els versos següents, dient el sacerdot (o qui dirigeix el rés) Tibi laus… i responent tots: Sanctus… Al final s'afegeix Glòria.

Sanctus Deus, Sanctus fortis, Sanctus immortális, miserére nobis.
Pater noster...
Tibi laus, Tibi glória, Tibi gratiárum áctio in sǽcula sempitérna, o Beáta Trínitas!
Sanctus, Sanctus, Sanctus Dóminus Deus exercítuum. Pleni sunt cæli et terra Glória tua.
Glória Patri et Fílio, et Spirítui Sancto.
Sicut erat in princípio, et nunc et semper et in sǽcula sæculórum. Amen.

Les altres dues denes es diuen de la mateixa manera, començant per les paraules Sanctus Deus… Al final de l'última dena, tots diuen la següent antífona:

Te Deum Patrem ingénitum, te Fílium unigénitum, te Spíritum Sanctum Paráclitum, sanctam et indivíduam Trinitátem, toto corde et ore confitémur, laudámus atque benedícimus: Tibi Glória in sǽcula.
Benedicámus Patrem, et Fílium cum Sancto Spíritu.
Laudémus et superexaltémus eum in sǽcula.
Orémus:
Omnípotens sempitérne Deus, qui dedísti fámulis tuis in confessióne veræ fídei, ætérnæ Trinitátis glóriam agnóscere, et in poténtia maiestátis adoráre Unitátem; quǽsumus, ut eiúsdem fídei firmitáte, ab ómnibus semper muniámur adversis. Per Chrístum Dóminum nóstrum.
Amen.

Acabada l'oració, tots diuen:

Líbera nos, salva nos, vivífica nos, o Beáta Trínitas!

Pro Defunctis

V/. Ne recordéris peccáta mea, Dómine.
R/. Dum véneris iudicáre sǽculum per ignem.
V/. Dírige, Dómine, Deus meus, in conspéctu tuo viam meam.
R/. Dum véneris iudicáre sǽculum per ignem.
V/. Réquiem ætérnam dona ei (eis), Dómine, et lux perpétua lúceat ei (eis)
R/. Dum véneris iudicáre sǽculum per ignem.
V/. Kýrie, eléison.
R/. Christe eléison, Kýrie eléison
Pater noster…
V/. Et ne nos indúcas in tentatiónem.
R/. Sed líbera nos a malo.
V/. A porta ínferi.
R/. Erue, Dómine, ánimam eius (ánimas eórum).
V/. Requiéscat (-ant) in pace.
R/. Amen.
V/. Dómine, exáudi oratiónem meam.
R/. Et clamor meus ad te véniat.

Sacerdotes addunt:

V/. Dóminus vobíscum.
R/. Et cum spíritu tuo.

Orémus:

Absólve, quǽsumus Dómine, ánimam fámuli tui (fámulæ tuæ) N. ab omni vínculo delictórum: ut, in resurrectónis glória, inter Sanctos et eléctos tuos resuscitátus (-a) respíret. Per Christum Dóminum nostrum.
R/. Amen.
V/. Réquiem ætérnam dona ei (eis), Dómine.
R/. Et lux perpétua lúceat ei (eis).
V/. Requiéscat (-ant) in pace.
R/. Amen.
V/. Ánima eius (Ánimæ eórum) et ánimæ ómnium fidélium defunctórum per misericórdiam Dei requiéscant in pace.
R/. Amen.